శ్రీ లక్ష్మీనృసింహ కరావలంబ స్తోత్రంశ్రీమత్పయోనిధినికేతనచక్రపాణే భోగీంద్రభోగమణిరాజితపుణ్యమూర్తే | యోగీశ శాశ్వత శరణ్య భవాబ్ధిపోత లక్ష్మీనృసింహ మమ దేహి కరావలంబమ్ || 1 ||
బ్రహ్మేంద్రరుద్రమరుదర్కకిరీటకోటి- -సంఘట్టితాంఘ్రికమలామలకాంతికాంత | లక్ష్మీలసత్కుచసరోరుహరాజహంస లక్ష్మీనృసింహ మమ దేహి కరావలంబమ్ || 2 ||
సంసారదావదహనాకరభీకరోరు- -జ్వాలావలీభిరతిదగ్ధతనూరుహస్య | త్వత్పాదపద్మసరసీరుహమాగతస్య లక్ష్మీనృసింహ మమ దేహి కరావలంబమ్ || 3 ||
సంసారజాలపతితస్య జగన్నివాస సర్వేంద్రియార్థబడిశాగ్రఝషోపమస్య | ప్రోత్కంపితప్రచురతాలుకమస్తకస్య లక్ష్మీనృసింహ మమ దేహి కరావలంబమ్ || 4 ||
సంసారకూపమతిఘోరమగాధమూలం సంప్రాప్య దుఃఖశతసర్పసమాకులస్య | దీనస్య దేవ కృపయా పదమాగతస్య లక్ష్మీనృసింహ మమ దేహి కరావలంబమ్ || 5 ||
సంసారభీకరకరీంద్రకరాభిఘాత- -నిష్పీడ్యమానవపుషః సకలార్తినాశ | ప్రాణప్రయాణభవభీతిసమాకులస్య లక్ష్మీనృసింహ మమ దేహి కరావలంబమ్ || 6 ||
సంసారసర్పవిషదగ్ధమహోగ్రతీవ్ర- -దంష్ట్రాగ్రకోటిపరిదష్టవినష్టమూర్తేః | నాగారివాహన సుధాబ్ధినివాస శౌరే లక్ష్మీనృసింహ మమ దేహి కరావలంబమ్ || 7 ||
సంసారవృక్షమఘబీజమనంతకర్మ- -శాఖాయుతం కరణపత్రమనంగపుష్పమ్ | ఆరుహ్య దుఃఖఫలితం పతతో దయాలో [చకితం] లక్ష్మీనృసింహ మమ దేహి కరావలంబమ్ || 8 ||
సంసారసాగరవిశాలకరాలకాల- -నక్రగ్రహగ్రసితనిగ్రహవిగ్రహస్య | వ్యగ్రస్య రాగనిచయోర్మినిపీడితస్య లక్ష్మీనృసింహ మమ దేహి కరావలంబమ్ || 9 ||
సంసారసాగరనిమజ్జనముహ్యమానం దీనం విలోకయ విభో కరుణానిధే మామ్ | ప్రహ్లాదఖేదపరిహారపరావతార లక్ష్మీనృసింహ మమ దేహి కరావలంబమ్ || 10 ||
సంసారఘోరగహనే చరతో మురారే మారోగ్రభీకరమృగప్రచురార్దితస్య | ఆర్తస్య మత్సరనిదాఘసుదుఃఖితస్య లక్ష్మీనృసింహ మమ దేహి కరావలంబమ్ || 11 ||
బద్ధ్వా గలే యమభటా బహుతర్జయంతః కర్షంతి యత్ర భవపాశశతైర్యుతం మామ్ | ఏకాకినం పరవశం చకితం దయాళో లక్ష్మీనృసింహ మమ దేహి కరావలంబమ్ || 12 ||
లక్ష్మీపతే కమలనాభ సురేశ విష్ణో యజ్ఞేశ యజ్ఞ మధుసూదన విశ్వరూప | బ్రహ్మణ్య కేశవ జనార్దన వాసుదేవ లక్ష్మీనృసింహ మమ దేహి కరావలంబమ్ || 13 ||
ఏకేన చక్రమపరేణ కరేణ శంఖ- -మన్యేన సింధుతనయామవలంబ్య తిష్ఠన్ | వామేతరేణ వరదాభయపద్మచిహ్నం లక్ష్మీనృసింహ మమ దేహి కరావలంబమ్ || 14 ||
అంధస్య మే హృతవివేకమహాధనస్య చోరైర్మహాబలిభిరింద్రియనామధేయైః | మోహాంధకారకుహరే వినిపాతితస్య లక్ష్మీనృసింహ మమ దేహి కరావలంబమ్ || 15 ||
ప్రహ్లాదనారదపరాశరపుండరీక- -వ్యాసాదిభాగవతపుంగవహృన్నివాస | భక్తానురక్తపరిపాలనపారిజాత లక్ష్మీనృసింహ మమ దేహి కరావలంబమ్ || 16 ||
లక్ష్మీనృసింహచరణాబ్జమధువ్రతేన స్తోత్రం కృతం శుభకరం భువి శంకరేణ | యే తత్పఠంతి మనుజా హరిభక్తియుక్తా- -స్తే యాంతి తత్పదసరోజమఖండరూపమ్ || 17 ||
ఇతి శ్రీమత్పరమహంసపరివ్రాజకాచార్య శ్రీమచ్ఛంకరాచార్య విరచితం శ్రీలక్ష్మీనృసింహ కరావలంబ స్తోత్రమ్ | — అధికశ్లోకాః — సంసారయోగ సకలేప్సితనిత్యకర్మ సంప్రాప్యదుఃఖ సకలేంద్రియమృత్యునాశ | సంకల్ప సింధుతనయాకుచ కుంకుమాంక లక్ష్మీనృసింహ మమ దేహి కరావలంబమ్ || 18 ||
ఆద్యంతశూన్యమజమవ్యయమప్రమేయం ఆదిత్యరుద్రనిగమాదినుతప్రభావమ్ | అంభోధిజాస్య మధులోలుప మత్తభృంగ లక్ష్మీనృసింహ మమ దేహి కరావలంబమ్ || 19 ||
వారాహ రామ నరసింహ రమాదికాంతా క్రీడావిలోల విధిశూలి సురప్రవంద్య | హంసాత్మకం పరమహంస విహారలీలం లక్ష్మీనృసింహ మమ దేహి కరావలంబమ్ || 20 ||
మాతా నృసింహశ్చ పితా నృసింహః భ్రాతా నృసింహశ్చ సఖా నృసింహః | విద్యా నృసింహో ద్రవిణం నృసింహః లక్ష్మీనృసింహ మమ దేహి కరావలంబమ్ || 21 ||
ప్రహ్లాద మానస సరోజ విహారభృంగ గంగాతరంగ ధవళాంగ రమాస్థితాంక | శృంగార సుందర కిరీట లసద్వరాంగ లక్ష్మీనృసింహ మమ దేహి కరావలంబమ్ || 22 ||
శ్రీశంకరార్య రచితం సతతం మనుష్యః స్తోత్రం పఠేదిహతు సత్వగుణప్రసన్నం | సద్యోవిముక్త కలుషో మునివర్య గణ్యో లక్ష్మీ పదముపైతి సనిర్మలాత్మా || 23 ||
యన్మాయయోర్జితః వపుః ప్రచుర ప్రవాహ మగ్నార్థ మత్రనివహోరు కరావలంబం | లక్ష్మీనృసింహ చరణాబ్జ మధువ్రతేన స్తోత్రం కృతం శుభకరం భువి శంకరేణ || 24 ||
శ్రీమన్నృసింహ విభవే గరుడధ్వజాయ తాపత్రయోపశమనాయ భవౌషధాయ | తృష్ణాది వృశ్చిక జలాగ్ని భుజంగ రోగ క్లేశాపహాయ హరయే గురవే నమస్తే || 25 ||
ఇతి శ్రీలక్ష్మీనృసింహ కరావలంబ స్తోత్రమ్ |

[download id=”399151″]