శ్రీ రమాపత్యష్టకమ్
జగదాదిమనాదిమజం పురుషం
శరదంబరతుల్యతనుం వితనుమ్ |
ధృతకంజరథాంగగదం విగదం
ప్రణమామి రమాధిపతిం తమహమ్ || 1 ||
కమలాననకంజరతం విరతం
హృది యోగిజనైః కలితం లలితమ్ |
కుజనైస్సుజనైరలభం సులభం
ప్రణమామి రమాధిపతిం తమహమ్ || 2 ||
మునిబృందహృదిస్థపదం సుపదం
నిఖిలాధ్వరభాగభుజం సుభుజమ్ |
హృతవాసవముఖ్యమదం విమదం
ప్రణమామి రమాధిపతిం తమహమ్ || 3 ||
హృతదానవదృప్తబలం సుబలం
స్వజనాస్తసమస్తమలం విమలమ్ |
సమపాస్త గజేంద్రదరం సుదరం
ప్రణమామి రమాధిపతిం తమహమ్ || 4 ||
పరికల్పితసర్వకలం వికలం
సకలాగమగీతగుణం విగుణమ్ |
భవపాశనిరాకరణం శరణం
ప్రణమామి రమాధిపతిం తమహమ్ || 5 ||
మృతిజన్మజరాశమనం కమనం
శరణాగతభీతిహరం దహరమ్ |
పరితుష్టరమాహృదయం సుదయం
ప్రణమామి రమాధిపతిం తమహమ్ || 6 ||
సకలావనిబింబధరం స్వధరం
పరిపూరితసర్వదిశం సుదృశమ్ |
గతశోకమశోకకరం సుకరం
ప్రణమామి రమాధిపతిం తమహమ్ || 7 ||
మథితార్ణవరాజరసం సరసం
గ్రథితాఖిలలోకహృదం సుహృదమ్ |
ప్రథితాద్భుతశక్తిగణం సుగణం
ప్రణమామి రమాధిపతిం తమహమ్ || 8 ||
సుఖరాశికరం భవబంధహరం
పరమాష్టకమేతదనన్యమతిః |
పఠతీహ తు యోఽనిశమేవ నరో
లభతే ఖలు విష్ణుపదం స పరమ్ || 9 ||
ఇతి శ్రీపరమహంసస్వామి బ్రహ్మానందవిరచితం శ్రీరమాపత్యష్టకమ్ |

[download id=”398949″]