భగవన్మానసపూజా
హృదంభోజే కృష్ణః సజలజలదశ్యామలతనుః
సరోజాక్షః స్రగ్వీ ముకుటకటకాద్యాభరణవాన్ |
శరద్రాకానాథప్రతిమవదనః శ్రీమురళికాం
వహన్ధ్యేయో గోపీగణపరివృతః కుంకుమచితః || 1 ||
పయోఽంభోధేర్ద్వీపాన్మమ హృదయమాయాహి భగవన్
మణివ్రాతభ్రాజత్కనకవరపీఠం నరహరే |
సుచిహ్నౌ తే పాదౌ యదుకులజ నేనేజ్మి సుజలైః
గృహాణేదం దూర్వాఫలజలవదర్ఘ్యం మురరిపో || 2 ||
త్వమాచామోపేంద్ర త్రిదశసరిదంభోఽతిశిశిరం
భజస్వేమం పంచామృతరచితమాప్లావ్యమఘహన్ |
ద్యునద్యాః కాళింద్యా అపి కనకకుంభస్థితమిదం
జలం తేన స్నానం కురు కురు కురుష్వాఽచమనకమ్ || 3 ||
తటిద్వర్ణే వస్త్రే భజ విజయకాంతాధిహరణ
ప్రలంబారిభ్రాతర్మృదులముపవీతం కురు గళే |
లలాటే పాటీరం మృగమదయుతం ధారయ హరే
గృహాణేదం మాల్యం శతదళతులస్యా విరచితమ్ || 4 ||
దశాంగం ధూపం సద్వరద చరణాగ్రేఽర్పితమయే
ముఖం దీపేనేందుప్రభవరజసా దేవ కలయే |
ఇమౌ పాణీ వాణీపతినుత సకర్పూరరజసా
విశోధ్యాగ్రే దత్తం సలిలమిదమాచామ నృహరే || 5 ||
సదా మృష్టాన్నం షడ్రసవదఖిలవ్యంజనయుతం
సువర్ణామత్రే గోఘృతచషకయుక్తే స్థితమిదమ్ |
యశోదాసూనో తత్పరమదయయాఽశా ససఖిభిః
ప్రసాదం వాంఛద్భిః సహ తదను నీరం పిబ విభో || 6 ||
సచంద్రం తాంబూలం ముఖరుచికరం భక్షయ హరే
ఫలం స్వాదు ప్రీత్యా పరిమళవదాస్వాదయ చిరమ్ |
సపర్యాపర్యాప్త్యై కనకమణిజాతం స్థితమిదం
ప్రదీపైరారార్తిం జలధితనయాశ్లిష్ట రుచయే || 7 ||
విజాతీయైః పుష్పైరతిసురభిభిర్బిల్వతులసీ
యుతైశ్చేమం పుష్పాంజలిమజిత తే మూర్ధ్ని నిదధే |
తవ ప్రాదక్షిణ్యక్రమణమఘవిధ్వంసి రచితం
చతుర్వారం విష్ణో జనిపథగతిశ్రాంత విదుషామ్ || 8 ||
నమస్కారోఽష్టాంగః సకలదురితధ్వంసనపటుః
కృతం నృత్యం గీతం స్తుతిరపి రమాకాంత త ఇదమ్ |
తవ ప్రీత్యై భూయాదహమపి చ దాసస్తవ విభో
కృతం ఛిద్రం పూర్ణం కురు కురు నమస్తేఽస్తు భగవన్ || 9 ||
సదా సేవ్యః కృష్ణః సజలఘననీలః కరతలే
దధానో దధ్యన్నం తదను నవనీతం మురళికమ్ |
కదాచిత్కాంతానాం కుచకలశపత్రాళిరచనా
సమాసక్తః స్నిగ్ధైః సహ శిశువిహారం విరచయన్ || 10 ||
మణికర్ణేచ్ఛయా జాతమిదం మానసపూజనం |
యః కుర్వీతోషసి ప్రాజ్ఞస్తస్య కృష్ణః ప్రసీదతి ||
ఇతి శ్రీమద్వల్లభాచార్యవిరచితా భగవన్మానసపూజా |
[download id=”400304″]