శ్రీ ఆదివరాహ స్తోత్రం (భూదేవీ కృతం)ధరణ్యువాచ | నమస్తే దేవదేవేశ వరాహవదనాఽచ్యుత | క్షీరసాగరసంకాశ వజ్రశృంగ మహాభుజ || 1 ||
ఉద్ధృతాస్మి త్వయా దేవ కల్పాదౌ సాగరరాంభసః | సహస్రబాహునా విష్ణో ధారయామి జగంత్యహమ్ || 2 ||
అనేకదివ్యాభరణయజ్ఞసూత్రవిరాజిత | అరుణారుణాంబరధర దివ్యరత్నవిభూషిత || 3 ||
ఉద్యద్భానుప్రతీకాశపాదపద్మ నమో నమః | బాలచంద్రాభదంష్ట్రాగ్ర మహాబలపరాక్రమ || 4 ||
దివ్యచందనలిప్తాంగ తప్తకాంచనకుండల | ఇంద్రనీలమణిద్యోతిహేమాంగదవిభూషిత || 5 ||
వజ్రదంష్ట్రాగ్రనిర్భిన్న హిరణ్యాక్షమహాబల | పుండరీకాభితామ్రాక్ష సామస్వనమనోహర || 6 ||
శ్రుతిసీమంతభూషాత్మన్ సర్వాత్మన్ చారువిక్రమ | చతురాననశంభుభ్యాం వందితాఽఽయతలోచన || 7 ||
సర్వవిద్యామయాకార శబ్దాతీత నమో నమః | ఆనందవిగ్రహాఽనంత కాలకాల నమో నమః || 8 ||
ఇతి శ్రీస్కందపురాణే వేంకటాచలమాహాత్మ్యే భూదేవీ కృత శ్రీ ఆదివరాహ స్తోత్రమ్ |

[download id=”399818″]