కమలాపత్యష్టకమ్
భుజగతల్పగతం ఘనసుందరం
గరుడవాహనమంబుజలోచనమ్ |
నళినచక్రగదాకరమవ్యయం
భజత రే మనుజాః కమలాపతిమ్ || 1 ||
అలికులాసితకోమలకుంతలం
విమలపీతదుకూలమనోహరమ్ |
జలధిజాశ్రితవామకళేబరం
భజత రే మనుజాః కమలాపతిమ్ || 2 ||
కిము జపైశ్చ తపోభిరుతాధ్వరై-
-రపి కిముత్తమతీర్థనిషేవణైః |
కిముత శాస్త్రకదంబవిలోకనై-
-ర్భజత రే మనుజాః కమలాపతిమ్ || 3 ||
మనుజదేహమిమం భువి దుర్లభం
సమధిగమ్య సురైరపి వాంఛితమ్ |
విషయలంపటతామపహాయ వై
భజత రే మనుజాః కమలాపతిమ్ || 4 ||
న వనితా న సుతో న సహోదరో
న హి పితా జననీ న చ బాంధవః |
వ్రజతి సాకమనేన జనేన వై
భజత రే మనుజాః కమలాపతిమ్ || 5 ||
సకలమేవ చలం సచరాచరం
జగదిదం సుతరాం ధనయౌవనమ్ |
సమవలోక్య వివేకదృశా ద్రుతం
భజత రే మనుజాః కమలాపతిమ్ || 6 ||
వివిధరోగయుతం క్షణభంగురం
పరవశం నవమార్గమలాకులమ్ |
పరినిరీక్ష్య శరీరమిదం స్వకం
భజత రే మనుజాః కమలాపతిమ్ || 7 ||
మునివరైరనిశం హృది భావితం
శివవిరించిమహేంద్రనుతం సదా |
మరణజన్మజరాభయమోచనం
భజత రే మనుజాః కమలాపతిమ్ || 8 ||
హరిపదాష్టకమేతదనుత్తమం
పరమహంసజనేన సమీరితమ్ |
పఠతి యస్తు సమాహితచేతసా
వ్రజతి విష్ణుపదం స నరో ధ్రువమ్ || 9 ||
ఇతి శ్రీమత్పరమహంస స్వామి బ్రహ్మానంద విరచితం కమలాపత్యష్టకమ్ ||

[download id=”399272″]