శ్రీమహాగణపతి నవార్ణ వేదపాద స్తవఃశ్రీకంఠతనయ శ్రీశ శ్రీకర శ్రీదళార్చిత | శ్రీవినాయక సర్వేశ శ్రియం వాసయ మే కులే || 1 ||
గజానన గణాధీశ ద్విజరాజవిభూషిత | భజే త్వాం సచ్చిదానంద బ్రహ్మణాం బ్రహ్మణస్పతే || 2 ||
ణషష్ఠవాచ్యనాశాయ రోగాటవికుఠారిణే | ఘృణాపాలితలోకాయ వనానాం పతయే నమః || 3 ||
ధియం ప్రయచ్ఛతే తుభ్యమీప్సితార్థప్రదాయినే | దీప్తభూషణభూషాయ దిశాం చ పతయే నమః || 4 ||
పంచబ్రహ్మస్వరూపాయ పంచపాతకహారిణే | పంచతత్త్వాత్మనే తుభ్యం పశూనాం పతయే నమః || 5 ||
తటిత్కోటిప్రతీకాశతనవే విశ్వసాక్షిణే | తపఃస్వాధ్యాయినే తుభ్యం సేనానిభ్యశ్చ వో నమః || 6 ||
యే భజంత్యక్షరం త్వాం తే ప్రాప్నువంత్యక్షరాత్మతామ్ | నైకరూపాయ మహతే ముష్ణతాం పతయే నమః || 7 ||
నగజావరపుత్రాయ సురరాజార్చితాయ చ | సుగుణాయ నమస్తుభ్యం సుమృడీకాయ మీఢుషే || 8 ||
మహాపాతకసంఘాతమహారణభయాపహ | త్వదీయకృపయా దేవ సర్వానవ యజామహే || 9 ||
నవార్ణరత్ననిగమపాదసంపుటితాం స్తుతిమ్ | భక్త్యా పఠంతి యే తేషాం తుష్టో భవ గణాధిప || 10 ||
ఇతి శ్రీ మహాగణపతి నవార్ణవేదపాద స్తవః |

[download id=”399115″]